2020年新鄧寇克大撤退－走定唔走？

Battle of Dunkirk係二戰其中一場最出名嘅戰役，呢段事蹟亦拍咗好多部電影。話說，1939年德軍突襲波蘭。英法向德宣戰，但冇採取主動進攻，只係主要布防喺當時認為「有險可守」、永不陷落嘅「馬其諾防線」(Maginot Line)。點知，1940年馬其諾防線陷落，德軍橫掃法國。有睇電影都知，差唔多40萬盟軍困咗喺法國北部沙灘鄧寇克，面對英倫海峽一片茫茫大海，前無去路，後有追兵。

邱吉爾(Winston Churchill)形容：「英軍嘅根、核心同大腦」都困住咗喺鄧寇克。但，如果派大大隻嘅軍艦去接士兵走，實俾德國轟炸機嘅當做箭靶，炸到hihi。於是，邱吉爾諗到一招奇謀：全國徵召中小型民船，揸船跨過英倫海峽接英軍走。原本計劃目標只係接走45,000個英軍，最後竟然成功救出338,226個聯軍士兵！為日後1944年盟軍反攻保全咗大部分戰力。

今日，幾百萬個人困咗喺東亞地區一個海港，同樣俾一個極右民族主義新興霸權迫到前無去路，後有追兵。Borish Johnson仿傚偶像邱吉爾，時隔80年再上演一次鄧寇克大撤退。（BJ喺2014寫左本書叫The Churchill Factor: How One Man Made History，有評論認為佢係自比邱吉爾，連筆風都模仿埋邱吉爾。）

有人問，點解盟軍有40萬人咁多，都唔同德軍死過？其實，唔係冇試過打，盟軍5月20日就試過反擊（阿拉斯戰役），一樣係輸，但成功buy time。撤退到鄧寇克時，已經俾人重重包圍，地理位置上沙灘「無險可守」，任由轟炸機／大炮轟炸，裝備又唔夠德國好，點打？再打都係送頭。倒不如保存性命，等待時機，4年後再諾曼第登陸。

To be, or not to be: that is the question。有人話，移民外國要做二等公民，唔走。OK，但留低唔走，就唔使做二等公民咩？況且，History is repeating itself，人類總是犯著同樣的錯誤。1933年希特拉上台，一樣有猶太人主流報紙支持佢執政，認為希特拉會務實理性尋求發展，戈林會好好領導公務員團隊發揮效率，唔會亂搞猶太人嘅。Well, the rest is history。