【影評】《相撲聖域》：相撲界的櫻木花道+三井壽｜勝負不重要，重要的是放下和成長
Jun 12
--
- 尋晚睇完Netflix《相撲聖域》(Sanctuary)，一套罕有講相撲（sumo）講得咁深入而又不失緊張刺激嘅劇集，8集講完，節奏明快。
- 迅狐中意睇美劇、日劇，因為幾集講完一個story。作為電影迷，比較欣賞電影導演出色嘅story telling skills（敘事技巧），用兩小時講好一個story，就好似business world一個成功嘅pitch咁—精、簡、準、有力。
- 得罪講句，迅狐非常討厭港劇、韓劇，分叉多幾條感情線，用成20–30集去講一個故事，阿婆咁長氣。如果一堆資料湧死人就work的話，睇wiki就得，點解要課金訂BBG、WSJ、FT？Less is more, OK?
- 講返《相撲聖域》，主角猿櫻令我諗起《男兒當入樽》嘅櫻木花道加三井壽。佢出身係櫻木花道，不良少年高中生，天才新秀，唔跟規則橫衝直撞，單憑天賦玩新運動初有少成。
（含劇透）
- 猿櫻嘅三井壽時刻，係去到中段，當佢俾大佢兩個size嘅對手靜內打甩右耳之後有心理陰影「我不打了」、得罪有錢仔失去金主、戴綠帽，跌落人生谷底，終於覺悟。
陳奕迅／林夕《開不了心》：「最後塵埃跌定，我就會翻生」
- 收起囂張自大（自卑）態度，束起頭髮，200%刻苦訓練，用敬語請師父指教，真心愛上相撲，尊重呢項歷史悠久嘅日本傳統。猿櫻嘅熱血激起咗成個部屋（道館）嘅鬥志，亦多咗一班好兄弟。
- 最後，調整咗心態、經過極刻苦特訓、多咗一班好兄弟撐嘅猿櫻，同宿敵靜內上土俵（擂台）決戰。
- 而靜內亦唔係好似打機大boss咁，停喺原位乜都唔做，等你重覆挑戰。戰前，佢亦都暫停職業選手生涯，完成咗一趟尋根之旅，正面面對不堪回首嘅屋企，調整咗心態，理應亦比之前更強。
- 一開戰，全劇終。邊個嬴？有冇續集？唔知，但亦唔重要。我諗套劇同《入樽》一樣，想講嘅係：一時勝負唔重要，重要嘅係放下同成長。
- 正如當年一大班人（包括迅狐）想睇《入樽》湘北嬴全國大賽冠軍，點知去到湘北打嬴山王就停刊/播。等咗二十幾年（小智同年都成為寵物小精靈大師）終於有電影版，成班大叔想入場睇湘北再下一城，點知，電影版只係用另一角度演繹湘北對山王。
- 但，電影提到，山王嘅澤北賽前去神社求神賜佢走向成功必要嘅磨練，最終佢獲得嘅，係一場敗仗。
- 全國大賽冠軍誰屬無人知，亦doesn’t really matter。井上老師可能想講：Come on, 高中生涯一場波算什麼？唔好鑽牛角尖，learn a lesson and move on。最後，宮城同澤北，一勝一敗，最後殊途同歸成功去咗喺美國打NBA。
- 又，師兄猿谷強忍舊患上土俵，最後一戰惜敗，提早引退，亦得到師父、sponsor、廣大觀眾、師兄弟嘅真心尊重。因為一個堂堂正正嘅相撲手貫徹咗自己嘅道，半生奉獻咗俾相撲，件事本身就值得尊重。
- 當然，依種諗法好違反「香港精神」。大多數香港人小事精明，做咩都係為短線嘅「嬴」，但有時會變左「嬴粒糖、輸間廠」。例如，催迫仔女嬴在起跑線，編排一大堆補習課外活動，忙過大人，生活上所有其他嘢outsource俾工人姐姐照顧，最後即使成績唔錯，入到心儀中學，但親子關係差，冇咗童年，自理能力低，抗打力低，未計worst case受唔住壓力自殺，長線真係「嬴」咩？
- 犬嶋放唔低年輕時輸俾主角師父猿將上唔到橫綱嘅「失敗」（精益求精嗰種「失敗」，因為上到大關，都算名成利就），最後入相撲協會坐board成為佢唔想成為嘅玩politics老屎忽，成日使橫手陰鳩猿將部屋。計數上係識玩嘅，但心底裡其實面對唔到自己（打爆自己後生時期嘅相撲手畫像），咁又真係嬴咩？
